Schwenkfeldt, Caspar – Ain Sendbrieff/ an ain gotförchtige frawen/ rc.

Wider das falsch erdichte außschreyen etlicher Predicanten zu Straßburg/ gegen Herr Caspar Schwenckfelden ein zeitlang geübt.

UNserem Herren vnd Regierenden Künig Jesu Christo/ sey alle gloria vnd herrligkait/ mit Gott seinem Vatter/ in ainigkait des hailigen gaistes/ vnd was ich in seiner gnaden liebs vnd guts vermag/ zuuor/ Ersame liebe Fraw/ geliebte freündin in Christo/ Von ewrer kranckhait ist mir gesagt/ vnnd das eüch Gott der Herr gnedigklich wider zur gesundthait hat geholffen/ Wie jr auch mitten in der kranckhait/ die herrlichait Jesu Christi geprisen/ vnd vnserer vnschuld/ wider die jhenigen/ so mich vnd andere mitbekenner der glorien Christi zeihen/ Das wir die menschait Christi verleüknen/ onschewlich zeügnus haben gegeben/ das wöll eüch der Herr Jesus mit gnaden vergelten/ Ich hoff auch Er hab eüch darumb wider gesund gemacht/ vnd werde eüch lenger alhie erhalten/ vff das jr seine gloria vnd seine H. menschhait/ Götliche eer vnd herrlichhait/ helfft preisen/ fürdern vnd bekannt machen. Das jr auch der Predicanten irrtumb zuuor gründtlich mögt erkennen/ eüch vnd andere darfür wisset zuhütten vnd zuwarnen/ darzu eüch auch das Büchlin von der hailigen schrifft/ vnnd anders mehr/ vermittels der gnaden Gottes/ kan dienen.

Wie möchten aber solche Predicanten etwas guts am Hauß Gottes bauwen: weil sie in warhait den Grund vnd ECKstain/ den Mann Jesum von Nazareth/ wie jhn die Apostel nennen/ freflich verwerffen/ jhn nit wöllen vnsern Herren/ Gott/ Erlöser vnd Seligmacher lassen bleiben/ sonder zur dienstbaren Creatur machen/ Gerad als ob Er nit der Eingeborne Sun Gottes/ noch vom H. gaiste sey empfangen. Ja als ob er nicht mit Gott alle ding regiere/ vnd als ob jm nit aller gewalt gegeben sey imm Himmel vnd vff erden.

Sie wolten Jm yeden Namen gern abrauben/ der über alle namen ist/ welchen er nach dem gehorsam seines Creützes von Got dem vatter/ do er jhn zu seiner rechten gesetzt/ hat empfangen/ daß imm Nammen Jesu/ alle knye sich biegen sollen/ vnd alle zungen bekennen daß Jesus Christus der Herr sey/ zur Glorien Gottes seines Vattern/ Philip. 2.

Aber sie werden nichts schaffen/ der grosse Stain/ der vom berg/ one menschen hende/ gerissen ist/ wirdt sie zermalen/ das sollen sie mit der zeit/ wa sy sich nit bessern/ gewißlich erfaren.

Sie sollen zusehen/ daß sie nicht die falschen Lerer seyend/ davon Petrus hat geweißsaget/ die verdebliche Secten einfüren/ vnd den Herren der sie erkaufft hat/ verleugknen.

Was thun sie aber anders? wann sie dem Manne Jesu Nazareno/ der am Creütz für vnns gestorben ist/ vnd vnns durch sein bittern tod außkaufft vnd erlöset hat/ seine folgende Götliche eer vnd herrlichait benemmen/ jhn zur Creatur machen/ auß dem Himmlischen wesen der H. Dreyfaltigkait circkeln/ nicht das haupt der Kirchen so inn alle derselben glider vnuermittelich die gnad vnd ewiges leben vnd seligkait einfleüßt/ wöllen lassen bleiben/ wie sie dann auch nicht in den Herrn können glauben/ weil man in kain creatur (darfür sie Christum/ nach seiner menschait halten) glauben/ als wenig sie jn anbetten/ welichen doch alle Engel Gottes anbetten/ vnnd als jren Herren vereeren.

Zu dem/ so verleügken sie Paulum/ widerstreben dem H. gaiste in jhm/ da er sagt: Daß der ander Adam zu ainem lebendigmachenden Gaist sey worden/ vnnd das alle Glider der gemain Gottes/ auß seinem flaische vnd von seinen gebainen geborn vnnd erzeüget werden. Ephes. 5.

Sollichs gleuben sie nicht/ noch das/ daß flaisch Christi/ vere, warhafftig speise/ vnd sein blut vere, warhafftig trencke zum ewigen leben/ noch daß wir de wesens Christi tailhafftig werden: Vnd wer den Gaist Christi nicht hat/ der ist nicht sein/ spricht Paulus: Dann wann sie solchs glaubten/ so wurden sie dem menschen in Christo Götliche macht/ eere vnd vermögen nicht benemmen.

In warhait so kennen sie nicht allain nicht Christum nach dem gaist/ oder gaistlich/ sonder sie verleücknen vnd lestern jn/ wöllen dannocht Prediger des Euangelii Christi/ ja seine wirdige diener vnd Apostel genannt werden.

Vnd wann wir mit der H. schrifft Christum den regierenden Himmel König glorificieren/ jm nach seiner gantzen person/ das ist/ inn verainigten beden Naturen/ alle Götliche eer/ krafft/ macht/ vnnd wircklichait/ wie billich/ zuaignen/ so beschuldigen sie vns mit vnwarhait/ wir verleügknen die menschait Christi/ oder vermengen seine Naturen/ Wie auch newlich Petrus Martyr/ der in Engelland Lesemaister ist/ mich vnnd andere/ den verdampten alten Ketzern Valentino vnd Marcion zugesellet/ vnnd onuerschambt schreibt/ Wir glauben nicht/ daß der ewig Sun Gottes/ Jesus Christus/ seinen leib/ von der hailigen Jungkfrawen Maria/ hab an sich genommen/ Sonder Er hab ainen Leib mit ihm vomm Himmel bracht.

Wa hat er aber sollichs in meinen Büchern gelesen? Ja dass widerspil ist darinn an vil ortten zefinden/ wie mir dann solcher verdampter Irrthumb nie inn sinn ist kommen. Zu dem/ daß ich zu Straßburg offentlich imm Synodo/ wider Melchor Hofmann dawider habe geredt vnd Disputiert/ Noch scheühen sie sich nicht wider mich so offentliche lugen (mit züchten) auch wider jr aigen gewissen auß selbs erdichtem eingebildtem wan/ hass/ vnd neid außzeschreyen vnd außzuschreiben/ das sie mich vnd andere/ weil wir alllain Christum vnd seine Herrlichait preisen/ nur yederman verdechtig köndten machen. Wie dann auch ain Hystoricus zu Basel/ Henricus Panthaleon/ wer er ist/ von mir/ mit gedachter lugen Chronisiert/ vnnd yetzt schreibt/ Er habs in meiner Jünger schrifften gelesen/ daß ich (mit den ketzern) das flaisch Christi/ auß Maria der Junckfrawen/ verleügkne.

Wer seind aber meine Jünger? Vnd ob es gleich iemands thete/ das ich doch nit glaub/ solte er aber darumb/ weil er ain warhaffter Historicus sein will/ vnd ich noch bey leben/ deßgleichen meine Bücher vorhanden/ nicht sich weiter des erkundigen. Nun Gott wirt sie finden/ deß Gericht ich sie will haimgestellt haben/ vnd mit dem Propheten Dauid betten/ Herr/ erreth mein seel von den lugen meülern/ vnd von den falschen zungen/ Ps. 120.

Solchs/ geliebte Fraw K. schreib ich eüch darumb destlieber/ weil jr mich mehr als zwaintzig Jar gekannt/ vnd wisset/ daß mir vnrecht geschihet/ Auf das jr sie auch darauß lernt recht kennen weß gaists kinder sie seind/ eüch vor jn mögt hüten/ auch andere vor jrer falschen lere warnen/ vnd mich gegen den guthertzigen verantwortten vnd vertretten.

Dann was können soliche (Viri mendaces) guts leren/ die auch den Christlichen glauben mehr für Schulkunst/ dann für Gottes gnad vnd gab hallten/ welche den albern/ ainfaltigen/ Gotförchtigen eher dann den aufgeblasnen Schulmaistern/ Schrifft oder Poetgelerten/ kan widerfaren/ auch ye vnd ye ist widerfaren/ Matth. 11.

Vnnd wann solche Prediger auch vor der welt erbare/ aufrichtige leüth wären/ so sollten sie die Punct. damit sie mich vnd andere außschreyen/ auß meinen Büchern darthun/ mich der irrthumb mit H. schrifft vberweisen/ wie die lieben alten Vätter vnd Kirchenlerer/ gegen den Arrianern/ Manicheern/ Valentinianern vnd andern Ketzern gethan/ vnd nicht also meuchlings/ vnredlicher/ vnerbarer weise (wie sie mit lugen thun) mit jnen haben gehandelt.

Sie entbieten sich wol/ im schein/ sie wöllen vil ort antzaigen/ wie auch der Wittenbergische maister Rabus/ gegen ainem gethan/ vnd gedenck ichs recht/ wol von 40 orten gesagt hat/ die er wöll anzaigen vnd aufzaichnen/ es seind aber Wasserblasen geweßt/ pracht vnd hoffart.

Aber man lasse sie nur waidlich amb regirenden gnadenkönig Christo vnd an seiner gesunden rainen lere anlauffen: die vnwarhait hat nit lenger stat/ dann bis die warhait ann tag kommt: So ist gewißlich die zeit nit ferr/ da jr torhait/ onwissenhait/ irrthumb/ verfürung/ vnd was schadens sie gethan/ vnd jre vermeßne sicherhait jederman sol kund vnd offenbar werden. Got der Herr geb/ dz es vil armen gewissen zu gut bald geschehe/ zu jrer besserung/ Amen.

Damit will ich eüch der gnade vnsers Herren Jesu Christi trewlich befolhen haben. Datum am tag Martini. 1551.

Caspar Schwenckfeld.

Vilgeliebte K. hiemit schicke ich eüch Zway Büchlin/ versehe mich/ jr habt die andern vor/ Vnd ob jr den Brief den Predicanten woltet weisen/ so ists mir nichts entgegen: Beduncket sie mein schreiben an eüch/ zu scharff sein/ so sollen sie bedencken/ wie es vil scherffer ist/  wann sie mich mit Namen vor ainer löblichen Gemain/ da auch ain erbarer Rath gegenwertig ist/ mit verdammten pösen Ketzereyen/ offenlich verleümbden vnd außschreyen/ dadurch sie mich vnd andere/ mit jrer erdichten vnwarhait/ in grosse gefar gern wolten bringen: Dann sie solchs nimmermehr können beweisen: Dagegen aber kan ich alles/ mit gutem grund/ vff sie beweisen/ dauon ich eüch schreibe. Ich will auch niemandts damit gemainet haben/ dann die mich also (mit züchten) beliegen. Bey D. Hedio/ den ich für ainn redlichen eerenmann hallte/ versehe ich mich ains bessern/ weder daß er mich mit vnwarhait solte vndersteen zu verlümbden/ wie dise thun/ daran er one zweifel kain gefallen hat: Gott vergeb es jnen wanns jnen laid wirt/ Geschichts nit/ so wirt Er sie am tag seines ernsten Gerichts wol wissen zufinden.

Caspar Schwenckfeldt an Bonifacius Wolfhardt (1542)

Freuntlicher lieber herr. Mir ist furkomen, als ob Pilgram Marpeckh, den ir on zweifel kennet, herren Wolffgang Meußlin ain buch zu besehen und sein judicum druber zu horen hab fur gelegt, darinnen under anderen ain artikel vom glauben der lieben alten vater patriarchen und propheten steen solle, das nemlich weder Abraham noch die andern hailigen vater im alten testament weder den hailigen gaist, noch kaine vergebung der sunden, sonder nur ainen figurlichen glauben gehabt haben, darauf Musculus solle gesagt haben, er kenne es wol, es sei des Schwenckhveldts schwermerei und irrung etc. Ist derhalben mein freintliche bitt an euch, wellet mich entschuldigen und ihn bitten, das er mich mit solchem nicht beschweren, noch mit deme oder dergleichen irrtumb, so mir mein lebenlang nie in synn komen, nicht also welle verdechtig machen, denn ich waiß, got lob, das Abraham, David und alle hailigen patriarchen und propheten den gaist Christi (wie auch 1. Pet: 1 steet geschriben) und vergebung der sunden, so wol als itz alle warglaubigen mit gutem gewissen, frid und freud ires herzens gehapt, das sie auch des kunftigen leidens und aller wohlthat Christi, so wol als wir, durch den waren glauben seligklich genossen, allain die offenbarung und zeitliche dispensacion schaidets, nemlich das solchs, was in Christo war verhaissen, nu in der folle der zeit geschehen ist, wie es dort geschehen sollte, und die, so es also dort, das es geschehen wurde, geleubt, durch den glauben eben so vil an Christo als wir gehabt haben. Solchs wellet ihm anzaigen, und nachmal bitten, das er got drunter forchten, und nicht wider mich so grymmig sein wolle, weil ich ihm doch kain laid nie gethan, sonder das er sich zuvor aller sachen recht well erfraen, auch mich drunder hören etc. Daran beschicht on zweifel gotte wohlgefallens, und es steht mir zu verdienen.

Beiträge zur Bayerischen Kirchengeschichte
herausgegeben von D. Theodor Kolde
ord. Professor der Kirchengeschichte an der Universität Erlangen
8. Band.
Erlangen 1902
Verlag von Fr. Junge.

Schwenkfeld, Caspar von – An Martin Luther

2. Dezember 1525

Lieber Herr Doctor! Ich bitte, wöllet das Schreiben wohl übersehen, und ob Euch wes darin fehlen würde, wöllets allenthalben aufzeichnen, wir wöllen Euch, will Gott, wohl genug thun. Ich versiehe und vertröste mich zu Gotte, dieweil ers angefangen, er werds auch ihm alleine zu Ehren und uns zur Besserung herausführen. Es ist unmöglich, daß des Papsts Reich soll untergehen, weil dieser Artikel des Fleisches und Bluts im Sacrament des Brots und Weins stehet.

Das Papstthumb hat auch hierinnen nichts mehr beim Glauben gethan, denn daß es den Bischof Berengarium wider sein Gewissen gedrungen hat, die Wahrheit in diesem Artikel zu widerrufen, wiewohl es seine Jünger nie dazu hat bringen mögen.

Gott wölle Euch sein göttliche Gnade verleihen, wie ers angefangen, daß es auch dermaßen vollendet werde, darumb denn viel fromme Brüder treulich bitten. Damit Gott befohlen!

Dr. Martin Luthers sämmtliche Werke.
Briefwechsel
Bearbeitet und mit Erläuterungen versehen von Dr. th. Ernst Ludwig Enders
Fünfter Band.
Briefe vom September 1524 – Dezember 1526
Calw & Stuttgart
Verlag der Vereinsbuchhandlung
1893