Dem durchlauchtigen hochgebornen Fürsten und Herrn Johans Marggrave zu Brandenburg, zu Stettin, Pomern und zu Slesien zu Crossen Hertzoge, und Burggrave zu Nornberg meinem gnedigen herrn.

Gottes gnad durch seinen eingebornen Son Jhesum Christum vnsern Heiland vnd wahrhaftigen helfer zu vor, Durchlauchter hochgeborner gnediger Fürst vnd herr E. f g. werden von den sachen, dem achtbaren vnd hochgelarten herrn Doctor Adriano beuohlen, wahrhaftigen vnd gruntlichen bericht von ihm vernemen, denn ehr die handlung nit allein von mir, sondern zu vor von Joachimo Cameraio, dem viel zu glauben ist, angehört.

Vnd wie wol ich wolt, die handlung were klarer gewesen, so ist doch durch gottes gnad, in kheiner verenderung in nottigen stücken gewilliget, vnd hat sich die Ritterschaft sonderlich wol vnd christlich gehalten, Ob auch Kais. M. mit diesem erbiten gesettiget sein werde, ist großer Zweifel, vnd so man weiter grubeln wirt, ist mein gemut entschlossen, durch Gottes Gnad, gantz nicht weiter nach zu geben, vnd der verfolgung zu gewarten.

Vnd wiewol hoch gerhümet wirt das Interiim soll eine newe ewige selige Reformatio sein, so acht ich doch es werde in zweyen Jahren wiederumb verlischen vnd das es zu großer unrug vnd zerruttung dienet, ist vor augen.

Diweil auch an vilen orten christliche predicanten veriagt werden, bitt ich vntertheniglich vnd vmb gottes willen E. f. G. wollen daruff gedenken, ob etwa ein Kloster dazu zu verordnen, da in der Eil arme bekante veriagte priester ein Zeitlang herberg haben mochten. Der Son Gottes Jesus Christus vnser heiland wolle E. f g. allezeit seliglich regiren vnd bewahren.

Datum Wittenberg am tag Timothei, der im funfzehenden Jar nach dem ehr mit S Paulo erstlich ausgezogen, gekopft ist worden zu Epheso, vnd ist nicht alt worden, aber Titus ist bei Leben blieben, vnd vber achtzig Jar als worden.

E. f. g.
vntertheniger diener
philippus Melanthon

Quelle: Zeitschrift für die historische Theologie Sechzehnter Band/ Neue Folge: Zehnter Band Leipzig, F. A. Brockhaus, 1846