Ebernburg, 1522 März 15
NAchdem sich Ulrich vom Hutten zum Stöckelberg aus beweglichen notgetranckten vrsachen: auch gemeiner Christenheit, vnd sonderlich Teütscher Nation meim Vatterland zu gut: des vnchristlichen: goltgeyrigen Rauberischen Volcks der Curtisanen: vor gutter zeyt abgesagter feyndt worden. Gegen denselbigen meynen feynden mit Vhedlicher that: man Raub, Brandt: Todschlag, vnd ander weiß zu handlen die heimlich, vnd offentlich zu beschädigen an jren leiben vnd güttern: zu veruolgen fürgenomen Vnd aber vngern wölt: dz durch dyß mein billich vnd vilfaltiglich Vorursacht Vornemen, Jemandt anders: wer der auch wer: geystlichs oder weltlichs stands: außerhalp der vorfluchten Curtisanen Sect Teütscher Nation schödlichens vnd grosten räubern: in einigem beschediget oder benachteilt solt werden, So hab ich meniglich, sich derselbigen Curtisanen zu entschlagen, von ynen ab zu sönndern: Ob yemants mit inn teyl oder gemeyn: das Jhenig ym zustendig: zu seynen hennden nemen: gutter trewer meynung hiemit vngewarnet nit wöllen lassen, Sich in dem allem der massen haben zu richten, vnnd zu halten: damit Geystlich vnnd Weltlich von der Erberkeyt: des Erlosen: Schanthafftigen Verdampten hauffens der Curtisanen, nit Entgelten: das mir dann: wo sollichs durch mich oder meyne helffer vnd vorwanten jmer beschehen sölt: trewlichen vnd von hertzen leydt wäre: will mich doch hiemit vorwart vnnd Entschuldigt haben, dan hynfür soll nyemandt vnnuerborgen seyn, das ich genante meyne feyndt mit Feür vnnd Eysin besuchen wurde, vnnd mich die: vnd Ire gütter zu beschädigen: sy seyn wo sy wöllen gesessen, oder gelegen: alles behelffs brauchen, wo nu yemant vber disse meyn trewe warnung sich genanter Curtisanen nit entschlagen, oder weytter mit Inn gemeyn haben würde, kan er ermessen, das ich deß keyn gefallen von ym tragen möchte: Sonnder wo er in dem also vorharrete, yn anders nit, den oben angetzeygte meine feyndt halten müste, das will ich hiemit gutter freüntlicher meynung: da mit des nyemannts vnwissens trag, zu erkennen geben:
Datum vnter meynem angebornen Insigel auff Freytag vor Judica. Im Jar nach Christi vnsers säligmachers geburt. Tausend Fünffhundert vnnd dem. xxij.
Vlrich von hutten scrips.
In dorso: Vhoedts brieff d. Vlrici Hutten\\
contra\\
die zuhandt lossen Curtisanen.
Zeitschrift für Kirchengeschichte
herausgegeben von
D. Theodor Brieger und Lic. Bernhard Bess.
XIV. Band
Gotha,
Friedrich Andreas Perthes
1894