Hans Zeysen – An Spalatin

Hanß Zeysens, Schöffers zu Alstedt, Schreiben an Spalatinum, am Sonntag Jubilate 1525. abgelassen, und den Bauern-Aufruhr in Thüringen betreffend.

MEin willig Dinst alzeit zuuor, meyn lieber Her vnnd freundt, ich hab eur schreiben geleßenn, aber ich fug euch wissen, das es vbell vnnd jammerlich hie zugehett, es sein alle closter hie vmb verwüstett. Die domina zu nauendorff ist zu Halle, es ist keyn herschafft hie meer angesehen, sondern ein grosse Verachtung außgossnn. Muntzer vnnd pfeiffer zu molhaussen sein in Irem hehre selber Rottmeister vnnd haubtleuth, sturmen vnnd plundern allenthalben, wue sie konnen, sie halten bey XV M starck, etliche sagen vber LM es gehen die sag nit gleich zue, aber im sey wie es wolle, so ist es ein jemerliche sach, das also vil fursten in disem landt sein sollen, vnnd keyner keyn schwerdt dogegen zucket, sie haben hern apel von ebleben schlos geplundert vnd geprant ebleben gnant, eyns dobey schlotheyn gnant, ein schloß vffm eyffelt, die harenburg gnant, ist der von Boltzungsleben. Aber von Rostenberg hat er mussen abzihen. So ligen bey VI M man hie zwue meyl von alstet, ghorn Im auch zue, die meren sich alle tag, zihen alle tag auff, reissen edelhoff vmb, weyl sie keyn closter meer haben. Item nemen kue vnnd neren sich also. Aber sie sein viel redlicher dan Muntzers hauff, sie sein nit so blutgirig als Muntzer, domit seyt got alweg beuolhen, ich thue euch was euch lieb ist. Datum Jubilate Ao.XXV.

Hanß Zeys, schosser zu Alstedt.

Johann Erhard Kappen
Kleine Nachlese
Einiger, größten Theils noch ungedruckter,
Und sonderlich
zur Erläuterung
Der
Reformations-Geschichte
nützlicher Urkunden
Anderer Theil
Leipzig
Bey Joh. Friedrich Brauns, sel. Erben, 1727.

Hans Zeysens, Schöffers zu Alstedt, Schreiben an Ge. Spalatinum

Hans Zeysens, Schöffers zu Alstedt, Schreiben an Ge. Spalatinum, Mitwochs nach Alexii 1524. abgelassen, und die von ihm gesuchte Verhör Thomä Müntzers betreffend, aus Zeysens eigenhändigem Exemplar.

Salutem, meyn lieber Her, sonderlicher Freundt, wie ich euch am nechsten zur Lochau gebeten, wie ich dan auch vnsern gnedigsten Hern, dozumal schrifftlich ersucht bericht habe, das von großen nothen sey, das magister Thomas verhort werde, als habt ir zugesagt, euch des zu bevleissenn, vnnd, so bald mein gnedigster Herdaßmals von der Jagt kemen, getreulich anzubrengen. Nun ist es von grossen nothen, das eß forderlich vnnd bald geschee, wie uf nechts auch Doctor Bruckenn hie bericht habe, das er sich beclagt, man wolle in nit horen, noch verhoren, vnnd wirdt seine lere also hie vmb außgebreytt vnter den gemeyn man, dodurch sie sich auch rotten, vnnd mit der predigt darauff dringt. Es ist groß zeit diese sach mit der vorheer fürtzunemen, dan geschiehts nicht, so ist contemptus principum vorhanden, ist zu besorgen, das sich das volck mit hauffen zusamen wirt werffen, wie er dan offentlich prophezirt, das wird placknn vnnd rawben, vnnd ein solicher vnlust in diser art werden, dovon nie abort, dorumb kert vleys an, das ein tag zu eyner offentlichen verhore angesetzt werde, zu erfarn, ob sein lere recht sey, befyndt sichs, das sie rechtschaffen ist, darob zu halten, wue nit, solichs fuglich abzuschaffen, dan vnerhort eine anderung zu machen, ist nicht zu thun. Das volck hengt vest an im, er thett nechst vor mein g. Hern baden furstl. hie ein sermon, den schick ich euch hiebey, er hat dem cantzler zusagt, vff vnsers gnedigsten Hern beuehel kein dingk drucken zulassenn, seine f. G. oder m. g. H. Hertzog Hannß haben es dan besichtigt, kert vleis an, das er furbeschieden werde, es were gein weymar, erffert oder sonst an gelegene stette, er will allerley volck dobey habenn, wie ir vielleicht bericht seytt, den brieff zu sittichbach habe ich Er Volckmarn zustellen lasßen. Domit beuihel ich euch vnnd mich got dem almechtigen. Datum eylendts mitwochen nach Allexii Anno rel. XXIIII°. Ich bit Euer freundtliche anttwort.

Hans zeys
schosser zu alstedt.

—-

Johann Erhard Kappen
Kleine Nachlese
Einiger, größten Theils noch ungedruckter,
Und sonderlich
zur Erläuterung
Der
Reformations-Geschichte
nützlicher Urkunden
Anderer Theil
Leipzig
Bey Joh. Friedrich Brauns, sel. Erben, 1727.